Qahramon Dadayev

Qahramon Dadayev
Qo`shiqchi
Tavallud sanasi:
1936

Yaxshi doirachi sifatida tanilgan, “Xizmat ko‘rsatgan”, O‘zbekiston xalq artisti» unvonlariga sazovor bo‘lgan. Doirada ajoyib milliy kuylar chalib, o‘zbek musiqa va raqs san’atining nodir durdonalarini jahon tomoshabinlariga yaqindan tanishtirgan. Doirada turli kuylarni shu qadar hayajon bilan berilib, zavq bilan chaladiki, uning bu mohirligiga beparvo qarash aslo mumkin emas.

Doirachi Qahramon Dadayev 1936 yilda Toshkentda tug‘ilgan. M.Turg‘unboyeva nomidagi xizmat ko‘rsatgan O‘zbekiston Davlat «Bahor» raqs dastasi (1954 yilda) tashkil bo‘lgandan beri Q.Dadayev ushbu ijodiy jamoada doirachi-solist sifatida faoliyat ko‘rsatib kelmoqda.

Doira chalishni juda erta, musiqa to‘garagiga qatnashib yurgan 50-yillarda boshlagan Q.Dadayev «Bahor» raqs dastasiga ishga kirgunga qadar ham ko‘pchilikka yaxshi doirachi sifatida tanilgan, unga nisbatan ma’lum darajada e’tibor bor edi. O‘z ustida tinmay ishlash, Usta Olimning ish mahorati sirlarini o‘rganish, ustozlari To‘ychi Inog‘omov, G‘ofir Inog‘omovlarning doira chalish usullarini, san’at sirlarini sinchkovlik bilan kuzatish natijasida murakkab va o‘ziga xos sohani puxta egalladi. Shu bois 18 yashar yosh yigit «Bahor» raqs dastasiga tezda doirachi sifatida ishga qabul qilindi.

Q.Dadayev Samarqand, Buxoro, Farg‘ona usullarini puxta o‘rgandi va ularni maromiga yetkazib ijro etdi. «Larzon», «Pilla», «Uchrashuv», «Havaskor», «Cho‘lpon*, «Zang» kabi o‘nlab kuylarni doirada chalganda tomoshabin hayajonlanadi, rohat qiladi, orom oladi, zavqlanadi.

Doirada turli kuylarni shu qadar hayajon bilan berilib, zavq bilan chaladiki, uning bu mohirligiga beparvo qarash aslo mumkin emas. Ana shu xususiyati bilan u zamonamizning tengi yo‘q doirachisi sifatida tan olindi, olqish va hurmatga sazovor bo‘ldi. Q.Dadayev bir necha marotaba Moskvada bo‘lgan O‘zbekiston adabiyoti va san’ati dekadalarida, qo‘shni respublikalarda o‘tkazilgan O‘zbekiston san’ati kunlarida faol qatnashib, mohir va iste’dodli doirachi sifatida shuhrat qozondi.

San’atkor 1955-1994 yillar mobaynida O‘zbekiston san’at ustalari va «Bahor» dastasi bilan AQSh, Yaponiya, Kanada, Xitoy, Iroq, Shvetsiya, Norvegiya, Finlyandiya, Italiya, Malta, Gvineya, Angola, Mozambik, Tunis, Shimoliy Koreya, Olmoniya, Avstriya, Polsha, Vengriya, Ruminiya, Yugoslaviya, Turkiya, Laos, Meksika, Ispaniya, Argentina, Kuba, Gretsiya, Angliya, Shotlandiya, Urugvay, Braziliya, Malayziya, Belgiya, Vetnam. Portugaliya, Dakar kabi mamlakatlarda ijodiy safarlarda bo‘lib, doirada ajoyib milliy kuylar chalib, o‘zbek musiqa va raqs san’atining nodir durdonalarini jahon tomoshabinlariga yaqindan tanishtirdi.

Mashhur doirachi Qahramon Dadayev 1973 yilda xizmat ko‘rsatgan O‘zbekiston Davlat «Bahor» xalq raqs dastasining 1971-1972 yillar kontsert dasturi uchun Davlat mukofotiga, 1977 yilda «O‘zbekiston xalq artisti» unvoniga sazovor bo‘ldi.

Manbaa: http://people.ziyonet.uz/uz/person/view/dadayev_qahramon_