Актёр ва артистларнинг экрандаги ва саҳнадаги исмлари ўзларининг асл исмларидан фарқ қилиши оддий ҳол эканлигини ҳамма билади. Баъзи машҳурлар қулоққа эриш туюладиган, эсда қолмайдиган ёки шунчаки жонларига теккан ўзларининг асл исмларини қўлқоп каби алмаштиришга ўрганиб қолганлар, баъзилари эса, аксинча, ўзларига бир марта ном танлаб, умрбод унга содиқ қоладилар. Бунга мисоллар жуда кўп. Ҳамма ҳам туғилганида жарангдор исм-шарифга эга бўлиш бахтига муяссар бўла олмайди, шунинг учун замонамизнинг машҳур кишиларидан баъзилари уларга туғилганларида берилган исм-шарифларини жарангдорроқ исм-шарифларга ўзгартириб олганлар. Мисол учун, Майкл Китон, Натали Портман, Мила Кунис, Кристофер Уокен, Жейми Фокс – буларнинг барчаси ўйлаб топилган исмлардир. Қуйида исм-шарифларини ўзгартирган машҳур инсонларнинг асл исмлари ва уни ўзгартиришга нима сабаб бўлгани ҳақида маълумот берамиз.
Майкл Китон (Майкл Дуглас)
Бир неча кун олдин “Олтин глобус” маросимида “Бердмен” фильмидаги роли учун “Олтин глобус” совринини қўлга киритган Майкл Китон актёрлик фаолиятини ўзининг асл исми Майкл Дуглас билан бошлаганини илк бор оммавий тарзда тан олди. Актёр ўз фаолиятининг бошида фамилиясини ўша пайтда шундай исмга эга бўлган бошқа актёр – Майкл Дуглас аллақачон машҳур бўлгани учун ўзгартиришга қарор қилган. Шу тариқа Майкл Китон исми пайдо бўлган ва актёр комик Бастер Китонга ҳавас қилгани учун унинг фамилиясини олишга қарор қилган.
Мила Кунис (Милена Марковна Кунис)
Келиб чиқиши украиналик бўлган Милена Марковна Кунис ўз она юртини 7 ёшида тарк этиб, оиласи билан Лос-Анжелесга кўчиб ўтган. Қизчанинг ота-онаси уни маҳаллий актёрлик маҳорати мактабига ўқишга берганлар. У ерда унга қийин талаффуз этиладиган славян исмидан воз кечишни таклиф қилишган ва айнан шу ҳолат Милага жуда қўл келган. У ўз исмини ўзгартиргандан сўнг икки йил ўтиб, Голливуддаги фильмларда суратга туша бошлаган. Ҳозирда эса Мила дунёдаги энг кўп ҳақ тўланадиган актрисалардан бири ҳисобланади.
Хоакин Феникс (Хоакин Рафаэль Боттом)
Хоакин Феникс жуда катта оиладан бўлиб, унинг оиласи ташвишлар ва кўнгилсизликлардан боши чиқмасди. Хоакиннинг ота-онаси Жон Ли ва Арлин Боттомлар “Худо болалари” деган диний оқимга тегишли бўлганлар ва бир-бирлари билан айнан оқимдаги миссионерлик фаолиятлари давомида учрашиб қолишган. Айнан шу фаолиятлари давомида улар ўз асл фамилияларини Феникс фамилиясига ўзгартиришга қарор қилганлар, бу улар учун барча нарсани бошидан бошлашни англатган.
Риз Уизерспун (Лаура Жин)
Оскар мукофоти совриндори Уизерспуннинг фамилияси унинг онаси ва бувисининг қизлик фамилияларининг бирлашмасидан иборат.
Кэти Пэрри (Кэтрин Хадсон)
Қўшиқчи поп мусиқа ижро этишдан олдин, ўзининг асл исми билан госпел (христиан динидаги мусиқа тури) жанрида қўшиқ айтиб юрган. Диний кечинмаларини жиловлаб олганидан кейин, қўшиқчи ўзининг фамилиясини онасининг қизлик фамилиясига ўзгартирган ва шу исм остида бутун дунёга танилган.
Кристофер Уокен (Рональд Уокен)
Актёрнинг расмий биографиясига кўра, унинг исми машҳур актёр Рональд Колманнинг шарафига шундай қўйилган экан. Актёр ўз исмини Кристоферга алмаштиришга туртки бўлган сабаблар ҳақида ҳеч нима демаган, бироқ у яхши жаранглайди.
Натали Портман (Натали Хершлаг)
Натали 1981 йилда Қуддус шаҳрида исроиллик шифокор Анвер Хершлаг ва америкалик Шейла Стивенснинг оиласида туғилган. АҚШга кўчиб ўтгач, Натали ўзининг яҳудий фамилиясидан воз кечиб, Портман фамилиясини олган. У ҳанузгача иккита давлат – Исроил ва АҚШ фуқароси саналади.
Вупи Голдберг (Кэрин Элейн Жонсон)
Сан-Диего шаҳридаги театрлардан бирида ижод қилувчи Керин Элейн Жонсон исмли ёш актрисани метеоризм (ошқозон дам бўлиши) билан боғлиқ муаммолари учун кўпчилик Вупи деб атарди (вупи – ҳазиломуз ёстиқча бўлиб, унга бирор одам ўтирганда, худди ел чиқаркандек овоз чиқарган). Голдберг фамилияси эса ўтган асрнинг 80-йилларида кино соҳасида фаолият юритган кўпчилик яҳудий продюссерларга яқин бўлиш учун шундай танланган.
Майли Сайрус (Дестини Хоуп Сайрус)
Майлининг отаси уни ёшлигида “Смайли” деб чақирар эди, айнан шу ном қўшиқчининг ижодий тахаллуси учун асос бўлди. Бироқ ўзининг “тақдир ва умид” деб таржима қилинувчи Дестини Хоуп исми ҳам чакки эшитилмайди.
Жулианна Мур (Жули Смит)
Актриса ўз интервьюларида ўзига тахаллус қидиришда жуда ҳам қийналганини кўп маротаба гапириб берган. Бунинг учун у ота-онасининг ҳужжатларини титкилашига тўғри келган ва ҳужжатлардан бирида отасининг иккинчи исми Мур бўлганини аниқлаган. Ўзининг Жули исмига онасининг Анна исмини қўшиб, ҳозирги исми-шарифига эга бўлган.
Жейми Фокс (Эрик Марлон Бишоп)
Фокс иккала жинсга ҳам тегишли бўлиши мумкин бўлган бундай тахаллусни ўзининг фаолияти бошида комедик кечаларда иштирокида кўпроқ томошабинларни жалб қилиш учун шундай тахаллус олган деган гаплар юради. Гўёки бу ҳолат қандай жинсга тааллуқли бўлган ҳажвияни кутишни билолмай иккиланган иккала жинс вакилларини ҳам ўзига жалб қилган.
Никки Минаж (Оника Таня Мараж)
Хип-хоп услубида куйловчи қўшиқчи ўзининг тахаллусини унга ўз хоҳиши билан ўтиришиб қолмагани учун унча ҳам ёқтирмайди. Никки фаолиятининг бошида катта артистларнинг чиқишларида раққоса бўлиб ўйнаб юрган кезларда кимдир унинг шартномасида унинг Мараж фамилияси ўрнига Минаж деб ёзиб юборган. Шу тариқа бу исм тахаллусга айланиб, ҳозирда бутун дунё уни шу исм билан танийди.
Бен Кингсли (Кришна Пандит Бханжи)
Актёрнинг отаси шифокор Раҳимтулла Харжи Бханжи Кенияда истиқомат қилган, келиб чиқиши Ҳиндистоннинг Гужорот штатидан бўлган. Актёрнинг ҳинд-африкалик илдизлари британиялик келиб чиқиши ва бенуқсон тарбияси эвазига анчагина билинмай кетган, бироқ актёрлик фаолияти учун Кришна Пандит Болливуддан келгандек туюлмаслик учун ўзига европача исм олишга қарор қилган.
Чарли Шин (Карлос Ирвин Эстевес)
Чарлининг бир бобоси келиб чиқиши Испаниядан бўлган, бошқа бобоси эса Ирландиядан бўлган. Бироқ шунга қарамай Голливуд саҳнасида хира мексикаликка ўхшаб кўринмаслик учун у ўзига кўпроқ американча талаффузли фамилия олишга қарор қилган. Бунда актёр Шин фамилиясини ўзининг устунлигига ишора қилиш мақсадида унга ўхшаш “шайн” (shine – ёрқин) сўзига яқин қилиб танлаган.
Майкл Кейн (Морис Жозеф Миклуайт)
Актёр Кейн ўзининг фамилиясини агентининг маслаҳатига кўра алмаштирган. Бу исмни у Хампфри Богарт иштирок этган ўзининг севимли фильми “Кейн қўзғолони” фильмидан олган.
Вин Дизель (Марк Синклер Винсент)
“Форсаж” фильмининг юлдузи ўзининг исмини Нью-Йоркдаги кечки клублардан бирида қўриқчи бўлиб ишлаб юрган кезларда алмаштирган. Вин – унинг фамилиясининг қискартирилган варианти, “Дизель” эса шунчаки жарангли эшитилган. Актёрнинг ҳозирги исми-шарифи унинг ўзига ва у ўйнайдиган ролларга жуда ҳам мос тушади.